Orkuveitan, ég er ekki að skilja hvernig þetta gat gerst.

Ótrúlegur subbuskapur sem þarna átti sér stað. Við sem unnum þarna fengum að njóta velmegunar flestir, þó mismikið. Árshátíðir í útlöndum þar sem flogið var með starfsmenn í hollum til að fyrirtækið væri ekki skilið eftir mannlaust. Þá fengu flestir starfsmenn, að minnsta kosti þeir sem báru einhvern titil skoðunarferðir til útlanda, skoða sýningar, skoða aðrar veitur, skoða þetta og hitt. Ég er viss um að væri þetta tekið saman þá skiptir þetta hundruðum milljóna ef ekki meir. Ég man að starfsmenn voru stundum að tala um hvað hver og einn væri búin að fara í margar vinnuferðir. Þetta virkaði eins og um keppni væri að ræða. Já og svo voru það veislurnar sem voru ófáar. Það var eins og eldhúsið væri orðin að aðalvinnustað fyrirtækisins. Nánast alla daga vikunnar var verið að útbúa veislur og fjöldi manns við þau störf, jafnvel fermingarveislur sumra starfsmanna. Þetta var ótrúlegt og þegar maður hugsar til baka fær maður óbragð í munninn. Ég held að fólk skilji ekki hvað hér gerðist, varla frekar en ég. Já það var betra að vera í liðinu og skilja að breyttir tímar voru komnir eins og þeir orðuðu það. En það kom að því að ballinu lauk með langt yfir 200 milljarða skuld á bakinu sem almenningur þarf að greiða. Nei þetta var ekki hægt en gerðist þó. Þá á auðvitað að fara nákvæmlega ofaní saumana og finna út hverjir bera ábyrgð á þessu. Það á auðvitað að draga þá menn fyrir dóm sem sýndu slíka vanrækslu í starfi sem þarna átti sér stað. Óráðsían og ómennskan var allstaðar í stjórnun fyrirtækisins. Sumir yfirmenn eru þarna en við störf sem bera fulla ábyrg á þessum gjörðum, en þetta ævintýri er búið og á eftir að kosta börnin okkar gríðarlegar fjárhæðir. Það er svo margt fleira sem ég gæti sagt um óhæfuverk þessara manna, en læt það bíða um sinn.